2017 必去旅游名单！3大最潮「蓝」色世界│Blue Zo

Happy New Year！2017年首要愿望当然係想继续活力十足，咁先可以去多好多转旅行，发掘更多新奇有趣的景点及见闻同大家分享嘛！咁…2017第1个旅程去边好呢？不如就由全球人均寿命最长的 Blue Zone 长寿区开始啦！吸收吓呢几个人间天堂的灵气，话唔定人都健康啲，又可以顺便跟一班人瑞偷师，学吓点样活得愈老愈精灵。

要成功打入 Blue Zone 之列真係一啲都唔容易，唔只要同一个地方有一定数量人瑞聚居，当地百岁老人仲要够精灵健康先配得上「长寿区」之名，所以全球 Blue Zone 数目其实寥寥可数。今次主要想为大家介绍长寿之冠意大利撤丁尼亚岛（Sardinia）、希腊伊卡里亚岛（Ikaría）以及哥斯达黎加尼科亚半岛（Nicoya Peninsula），几个地方的自然景观及生活习惯都各有特色，唯一共通点就係大家都属于简朴宁静的小岛，或者远离都市烦嚣亦係孕育出人瑞的关键之一。虽然冇可能过去长住，但放个长假过去hea吓都未尝不可，就算延唔到寿，减吓压叉个电都好呀！

 

Blue Zone #1

意大利秘密度假胜地 撤丁尼亚岛

撤丁尼亚係地中海第二大独立岛屿，属于欧洲最古老地区之一，岛上最出名係绝美海岸线，蔚蓝海水加上细白沙滩，沿岸屹立住一排排色彩缤纷的小屋，充满意大利渔村风情，难怪咁多皇室政要同明星都将呢个 Blue Zone 小岛当成度假天堂。

 

嚟到撤丁尼亚一定要体验地道饮食文化，小岛中部有个名为Sarcidano的地区，係地中海珍贵产物「Liquid Gold」，亦即是橄榄油的重要产地，据讲该区出品的橄榄都係全岛最优质、营养价值最高的，特别适合製作无添加初榨橄榄油。大家都知橄榄油的不饱和脂肪对预防心血管病有益处，原来当中仲含有维他命E同多酚呢2种抗氧化物质，当地人几乎餐餐都会食橄榄或者用橄榄油煮食，去开旅行不妨选购啲橄榄或橄榄油做手信，试下食完会唔会感觉健康咗。

 

 

 

Blue Zone #2

希腊最清澈海洋 伊卡里亚岛

去过希腊跳岛游都知，圣托里尼岛（Santorini）实景真係同明信片一样咁靓，望几多次都依然会忍唔住「哗」出声，不过今年係时候转转场。另一边厢 Blue Zone 伊卡里亚岛（Ikaría）同样有蓝天白云、水清沙幼，唯独蓝白小屋变咗做红白小屋，同埋冇川流不息的游客，最震撼係海水竟然比圣托里尼岛仲要更清澈更见底。伊卡里亚一直被誉为全希腊最悠闲小岛，岛民奉行「慢活」主义，完全唔会同你赶时间，亦唔锺意跟schedule做人，香港人平日做嘢咁大压力，放假过去避世放鬆下，一定可以疲劳尽消。

 

 

 

Blue Zone #3

哥斯达黎加生态王国　尼科亚半岛

如果你係大自然狂迷，特别锺情穿梭于木林之间、享受近距离观察野生动物、重视生态保育，尼科亚半岛（Nicoya Peninsula）一定係你杯茶！事关呢个中美州最具人气旅游国家有超过25%面积被列为国家公园及保护区，单係 Blue Zone 地带尼科亚半岛最南端的Cabo Blanco自然保护区就有超过35,000种野生动物，白尾鹿、斑点豚鼠、食蚁兽、捲尾猴……数都数唔晒，区内仲有哥斯达黎加最优美的景观，任你日日马拉松式参加导赏团，留足1个月都未必可以睇清呢个保护区的「全相」。